Preloader

საინფორმაციო ტექნოლოგიების ცენტრი მზიური

ინტერნეტშეჯიბრის მიზანი და მონაწილეობა

ინტერნეტშეჯიბრების მიზანია ადრეულ ასაკში მოსწავლეთათვის მათემატიკურ-ლოგიკური აზროვნების განვითარება, მათემატიკური ნიჭით დაჯილდოებული ბავშვების გამოვლენა და წახალისება, სკოლებში მათემატიკის წრეობრივი მუშაობის გააქტიურება. აქტიური მასწავლებლების გამოვლენა და წახალისება.
ინტერნეტშეჯიბრი განკუთვნილია საქართველოს საჯარო და კერძო სკოლების IV-V კლასების მოსწავლეთათვის. სურვილისა და შესაძლებლობის შემთხვევაში მასში მონაწილეობა შეუძლიათ III და VI კლასების მოსწავლეებსაც.
ინტერნეტშეჯიბრში მონაწილეობის მიღება შესაძლებელია როგორც ინდივიდუალურად - ოჯახიდან საკუთარი კომპიუტერის საშუალებით, ასევე, სკოლიდან, მასწავლებლის დახმარებითა და სკოლის კომპიუტერების გამოყენებით.
იმედი გვაქვს, რომ მათემატიკის მასწავლებლები აქტიურად ჩაერთვებიან პროცესში. ასევე, ვიმედოვნებთ, რომ საჭიროების შემთხვევაში მათ დახმარებას გაუწევენ სკოლების ინფორმაციული მენეჯერები და/ან ინფორმატიკის მასწავლებლები.
მათემატიკის მასწავლებლებისაგან მხოლოდ მცირედი მოითხოვება - გამობეჭდეთ ტურის ამოცანები ორიოდე ეგზემპლარად და გამოაკარით სკოლაში თვალსაჩინო ადგილებზე, რათა დაინტერესებულ მოსწავლეებს საშუალება ჰქონდეთ ამოცანებს გაეცნონ. მითითებულ ვადაში მოსწავლეებმა უნდა ამოხსნან ამოცანები და ნამუშევრები გადმოგვიგზავნონ. იქიდან გამომდინარე, რომ ტურები დაუსწრებელია, მასწავლებლებს აქვთ მოსწავლეთა გარკვეული დახმარების საშუალება.
ამოხსნების გადმოსაგზავნად მასწავლებლის აქტიურობა იქნება საჭირო, რათა კომპიუტერული კლასის თავისუფალი დრო შეარჩიოთ და კლავიატურაზე ამოხსნების აკრეფაში დაეხმაროთ.
ტურის დამთავრების შემდეგ მონაწილეთა გადმოგზავნილი ნამუშევრები განიხილება, შეფასდება და გამოიკიდება გავლილი ტურის ანალიზი (ამოცანების ამოხსნები, შეფასების სქემა, მოსწავლეთა შედეგები და მათი კომენტარები).
შეფასდება არა მარტო მოსწავლეთა ამოხსნები, არამედ მასწავლებელთა აქტიურობა.
განვლილი ტურების ამოცანების, მათი ამოხსნებისა და შედეგების დათვალიერება ყველას შეუძლია. რაც შეეხება ამოცანების ამოხსნების გადმოგზავნას, ამისათვის აუცილებელია, რომ მოსწავლემ გაიაროს რეგისტრაცია.
შეიძლება გარკვეულ შემთხვევებში თავი იჩინოს ქართულ შრიფტთან დაკავშირებულმა პრობლემებმა. ასეთ (ან სხვა გაუგებრობების) შემთხვევებში შეგიძლიათ შეკითხვა გადმოგვიგზავნოთ ელ-ფოსტაზე info@mziuri.ge ან დაგვირეკოთ ტელეფონზე 295-45-75 და მიიღოთ დახმარება.

ეწვიეთ ჩვენს Facebook გვერდს

კონტაქტი

გაქვთ დამატებითი კითხვები? მოგვწერეთ...

შეტყობინება